Bilbok eta Donostiak beren Lonely Planet gida izango dute

Bilbok, Donostiak eta Euskadiko beste zenbait lekuk beren gida izatea merezi dutela erabaki du Lonely Planet giden argitaratzaileak. Editorearen bildumako gida guztiek bezala, aholkuak eta informazio xehatua eskainiko diote bidaiariari, eta horrela, norakoaz gozatzeko aukera izango dute ezer garrantzitsurik galdu gabe, eta gainera, poltsikoa zainduta. Lonely Planet munduko gida turistiko hedatuenetako eta ezagunenetako bat da. 1973an ekin zion ibilbideari, Across Asia on the Cheap (Asian zehar gutxi gastatuz) lehen liburuarekin. Liburu hori Maureen eta Tony Wheeler senar-emazteek Turkiatik egindako bidaia baten emaitza izan zen Iran, Afganistan, Pakistan, India eta Nepal zeharkatuz. Denbora igaro ahala, Lonely Planet erreferentzia bihurtu da mundu osoan bidaiatzeko; gaur egun, 500 titulu baino gehiago daude, eta bost kontinenteetako milaka norako xehetasunez ezagutzeko aukera eskaintzen dute. Egun, Lonely Planet argitaratzailea BBCrena da, eta telebista produktore bat, aldizkari espezializatuak eta beste euskarri batzuk ere baditu. Poltsikoko Lonely Planet Bilbo eta Donostia gida garrantzitsuak izatea espero da bi euskal hirietan zer ez galdu jakiteko eta haien sekretuak ezagutzeko. "Bilboko Guggenheim museoan txunditzea, Gernikaren historian murgiltzea edo Donostiako hondartza perfektuak ezagutzea" dira argitalpenaren argitaratzaileen lehen aholkuak. Gainera, argitaratzaileak egin ohi duen moduan, xehetasunez betetako mapak eta planoak izango dituzte gidek, baita ibilbide gomendagarriak, adituen iradokizunak, prezioen informazioa, telefono interesgarriak eta mugimenduak ere, besteak beste. Hala ere, bidaiari aktiboentzako aholkuak eta aztarnak eskainiko dira batik bat; hain zuzen, horiek eman baitie Lonely Planet gidei izaera berezia.